बारामा सेनाबाट हुरीपीडितको घर निर्माणकाे थालनी

बैशाख ३०, २०७६ । नेपाली सेनाले गत चैत १७ गते आएको हुरीबाट घरबारबिहिन भएका बाराका स्थानीयको घर बनाइदिन थालेको छ। बाराको परवानीपुर गाउँपालिका वडा नम्बर–४ स्थित चैनपुरमा हुरीले क्षति पु¥याएका २१५ घरमध्ये पहिलो चरणमा ९३ घरको निर्माण सेनाले थालेको हो । चैनपुरका २१५ घरको निर्माणका लागि वीरगन्जस्थित नेपाली सेनाको चण्डीप्रसाद गणका सेनानी हरिकुमार पाण्डेको कमाण्डमा ४५० जना सेनाको टोली खटिएको छ । सेनाको टोलीले चैनपुरमै अस्थायी क्याम्प बनाएर हुरीपीडितको घर निर्माणलाई तीब्रता दिएको हो । तीन चरणमा घर निर्माण सक्ने र एक एक महिनाको दरले तीन महिनामा सबै २१५ वटा नै घर बनाउने तयारी थालिएको सेनानी पाण्डेले बताउनुभयो । वैशाख २१ गते उपप्रधान तथा स्वास्थ्यमन्त्री उपेन्द्र यादवसहितको टोली बारामा पुगेर घर निर्माणको शिलान्यास गरेका थिए ।

चैत १७ गतेको हुरीले बाराको फेटा र परवानीपुर गाउँपालिकासहितमा ठुलो क्षति पुर्याएको थियो । बारा र छिमेकी जिल्ला पर्सामा समेत गएको हुरीले २७ जनाको ज्यान लिएको थियो । हुरीले बााराको फेटा गाउँपालिको वडा नं १ र कलैया नगरपालिका वडा नं १८ मा पर्ने भलुही भरबलिया गाउँमा ठुलो क्षति भएको थियो त्यस्तै बाराको परवानीपुर गाउँपालिका वडा नं ४ चैनपुरमा २१५ घर ध्वस्त भएका थिए ।