दशैंको अवसर पारेर गल्छि गाउँपालिकाको बैरेनी बजारमा किराना पसलहरुको अनुगमन
१५ असोज २०७६, बुधबार ।
गल्छि- धादिङको गल्छि गाउँपालिकाको आयोजनामा बैरेनी बजारमा किराना पसलहरुको अनुगमन भएको छ । नेपालको संविधानले व्यवस्था गरे अनुसार स्थानिय तहले बजार अनुगमन गरेको हो । गल्छि गाउँपालिका उद्योग शाखाको संयोजनमा बजार अनुगमन गरिएको गाउँपालिको उपाध्यक्ष राधा तिम्लसिनाले बताउनुभएको छ ।
असोज १३ र १४ गते दुई दिन भएको बजार अनुगमनमा सर्वसाधारणहरुर्ले उपभोग गर्ने बस्तुहरुको अनुगमन गरिएको हो ।
नेपालीहरुको महान पर्व दशैं शुरु भएपछि दैनिक उपभोग गर्ने खाद्यन्य बस्तुहरुको अनुगमन गरिएको छ । बैरेनी बजारका ६२ व्यवसायिक फर्महरुको अनुगमन गरिएको छ । अनुगमनको क्रममा व्यवसायिक फर्महरु दर्ता तथा नविकरण, मूल्यसूची, सामानको म्याद नाघे ननाघेको अनुगमन गरिएको छ । दर्ता भई नविकरण नभएका पसलहरु लाई नविकरण गर्न आग्रह गरिएको तथा दर्ता नभएका फर्महरु लाई दर्ता गराउंन आग्रह गरिएको उपाध्यक्ष तिम्लसिनाले बताउनुभयो ।
कति पय पसलहरुका म्याद नाघेका सामानहरुलाई नष्ट गरिएको वडा नम्बर ६ का वडा अध्यक्ष राजन श्रेष्ठले जानकारी दिनुभयो त्यसैगरी म्याद नाघेका सामान नराख्न पनि आग्रह गरिएको छ ।
अनुगमन कार्यक्रममा उद्योग शाखाका प्रमुख सरिता गौतमको संयोजनमा भएको कार्यक्रममा गाउँपालिका उपाध्यक्ष राधा तिमल्सिना, वडा नम्बर १ का वडा अध्यक्ष पूर्ण प्रसाद खतिवडा, वडा नम्बर ६ का वडा अध्यक्ष राजन श्रेष्ठ, नि.प्रशासकिय अधिकृत बुद्धि प्रसाद भट्ट, प्रहरी चौर्की बैरेनीका प्रमुख जनक बस्नेत, कार्यालयका कर्मचारी लगायतको सहभागीता रहेको वडा अध्यक्ष राजन श्रेष्ठले बताउनुभयो ।
