जनताको म्यान्डेट सिंहदरबार चलाउन होइन, सिंहदरबारको अवस्था बदल्नका लागि हो : रवि लामिछाने

काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो पार्टीले पाएको जनमत केवल सरकार चलाउनका लागि मात्र नभई विद्यमान व्यवस्था र कार्यशैली बदल्नका लागि भएको स्पष्ट पारेका छन् । प्रतिनिधि सभाको पहिलो बैठकलाई बिहीबार सम्बोधन गर्दै उनले रास्वपाले प्राप्त गरेको मत नेपाली जनताको आशा र आक्रोशको प्रतिविम्ब भएको उल्लेख गरेका हुन् ।

उनले जनताको भावना र मतादेशको कदर गर्दै जिम्मेवार भएर अघि बढ्ने प्रतिज्ञा समेत गरेका छन् । सभापति लामिछानेले जनताले परिवर्तनकै खोजीमा रास्वपालाई रोजेको भन्दै उक्त विश्वासको गुण कामबाटै तिर्ने बताए ।

अब पार्टी र सरकारले बोलेर भन्दा पनि नतिजामुखी काम गरेर आफ्नो औचित्य प्रमाणित गर्नुपर्ने बेला आएको उनको भनाइ छ । ‘हामीले पाएको मत समर्थनको मात्र होइन, यो त परिवर्तनको मत हो,’ उनले सदनमा भने, ‘जनताले दिएको म्यान्डेट सिंहदरबार चलाउन होइन, सिंहदरबारको अवस्था बदल्नका लागि हो ।’ उनले आफूहरूले परिवर्तनको सुरुवात गरिसकेको दाबी गर्दै अब रास्वपाका सांसदहरूले कामबाटै आफूलाई प्रमाणित गर्नुपर्नेमा जोड दिए ।

सम्बोधनका क्रममा उनले अबका दिनमा सरकारका कामहरूले नै बोल्ने विश्वास व्यक्त गरे । सुशासनको सवालमा आफ्नो पार्टीले कुनै पनि प्रकारको सम्झौता नगर्ने प्रतिबद्धता जनाउँदै उनले भ्रष्टाचार नियन्त्रण र सेवा प्रवाहमा आमूल सुधार ल्याउने बताए ।

पुराना राजनीतिक दलहरूको कार्यशैलीप्रति जनताको असन्तुष्टि नै रास्वपाको उदयको मुख्य कारण रहेको संकेत गर्दै उनले जनताको अपेक्षा अनुसारको नयाँ राजनीतिक संस्कार स्थापित गर्ने दाबी गरे । सदनमा उपस्थित अन्य दलहरूलाई पनि जनभावना बुझेर काम गर्न आग्रह गर्दै उनले रास्वपा सधैं जनताको पक्षमा उभिने स्पष्ट पारे ।