प्रधानमन्त्री ओलीको भारत भ्रमणको तालिका सार्वजनिक, समकक्षी मोदीलाई २४ गते भेट्ने
काठमाडौं । परराष्ट्र मन्त्रालयले प्रधानमन्त्री केपी शर्मा ओलीको यही चैत २३ गतेदेखि हुने राजकीय भारत भ्रमणको तालिका शुक्रबार सार्वजनिक गरेको छ ।
तालिका अनुसार प्रधानमन्त्री ओली चैत २३ गते नयाँदिल्ली गएर चैत २५ गते स्वदेश फर्कनु हुनेछ । चैत २४ गते भारतीय समकक्षी नरेन्द्र मोदीसँग दुईपक्षीय वार्ता हुने कार्यक्रम तय भएको छ ।त्यस्तै, भारत सरकारका केही मन्त्रीहरुले प्रधानमन्त्री ओलीसँग भेटवार्ता गर्नेछन् भने नयाँदिल्लीमा रहँदा प्रधानमन्त्री ओलीले भारतीय राष्ट्रपति रामनाथ कोविद र उपराष्ट्रपति बङ्कैया नायडूसँग भेट गर्ने जानकारी परराष्ट्र मन्त्रालयले प्रेस विज्ञप्तिमा उल्लेख गरेकाे छ ।
भ्रमण दलमा प्रधानमन्त्री ओलीकी पत्नी राधिका शाक्य, केही मन्त्री तथा विभिन्न मन्त्रालयका अधिकारीहरु सहभागी हुने पनि परराष्ट्रले जनाएको छ ।
यसैबीच, भारतीय विदेश मन्त्रालयले पनि शुक्रबारै प्रधानमन्त्री ओलीको विदेश भ्रमणको कार्यक्रम सार्वजनिक गरेको छ ।
