Upendra Adhikari
धादिङ, ११ जेठ – धादिङको नीलकण्ठ नगरपालिका-४ रायटारमा हाइटेन्सन विद्युतको लाइनबाट करेन्ट लागेर गम्भीर घाइते भएकी ६ वर्षीया बालिका साया श्रेष्ठको उपचारका क्रममा मृत्यु भएको छ।
नीलकण्ठ नगरपालिका वडा नं. ८ स्थायी घर भएका सुजन श्रेष्ठ र अस्मिता श्रेष्ठकी ६ वर्षीया छोरी साया आइतबार दिउँसो रायटारस्थित एक घरमा खेलिरहेकी थिइन्। सोही क्रममा उनले चलाएको पोछा लगाउने फलामको डन्डी अचानक नजिकै रहेको विद्युतको हाइटेन्सन लाइनको तारमा ठोक्किन पुगेको थियो। फलामको डन्डीमार्फत आगोको झिल्कोसहित करेन्ट प्रवाह हुँदा उनी गम्भीर घाइते भएकी थिइन्।
दुर्घटना लगतै उनलाई उद्धार गरी थप उपचारका लागि तत्कालै हेलिकप्टरमार्फत काठमाडौँ पठाइएको थियो। कीर्तिपुरस्थित कीर्तिपुर बर्न हस्पिटलमा भर्ना गरी उपचार भइरहेको अवस्थामा उनको मृत्यु भएको जिल्ला प्रहरी कार्यालय धादिङले जनाएको छ।
