जनता समाजवादीका दोस्रो तहका नेता निर्वाचन आयोगमा, शीर्ष नेता बबरमहलमा
काठमाडौं, २५ जेठ । जनता समाजवादीका शीर्ष नेताहरु वरियता विवादका कारण बबरमहलस्थित राजपाकै कार्यालयमा रोकिएका छन् । साँझ ६ बजेसम्म उनीहरु छलफलमै रहेका छन् ।
यता निर्वाचन आयोगमा जनता समाजवादी पार्टीका दोस्रो तहका नेताहरु शीर्ष नेतालाई कुरिरहेका छन् । स्रोतका अनुसार महन्थ ठाकुरले पहिलो वरियतासहित कार्यकारी अध्यक्षमा अडान लिएपछि विवाद लम्बिएको हो ।
यसअघि पहिलो वरियताको अध्यक्षसहित संघीय परिषद् अध्यक्षमा डा. भट्टराईलाई जिम्मेवारी दिने निर्णय भएको थियो । महन्थ ठाकुर र उपेन्द्र यादव क्रमशः दोस्रो र तेस्रो वरियतामा रहने र उनीहरुले कार्यकारी अध्यक्षको भूमिका निर्वाह गर्न सहमति भएको थियो ।
आज पार्टी एकताको सूचना दिएको ४५ दिन नाघ्दैछ । आज निर्वाचन आयोगमा दर्ता हुन नसके पार्टी एकता थप कानूनी जटिलतामा फस्नेछ ।
