देश विकास

काठमाण्डौ । काठमाण्डौ स्थित टुकुचा खोलाको सुरूङ उत्खनन् गर्न नपाउने पुरातत्व विभागले निष्कर्ष निकालेको छ । पुरातत्वविद् भाष्कर ज्ञवालीको संयोजकत्वमा बनेको विज्ञ समितिले टुकुचाको संरक्षण गर्नुपर्ने भनी प्रतिवेदन बुझाएको पुरातत्व विभागका प्रवक्ता रामबहादुर कुँवरले बताउनुभयो । ‘समितिले बुझाएको प्रतिवेदनमा महानगरले टुकुचा सुरूङ उत्खनन् गर्न नपाउने र त्यसलाई संरक्षण गर्नुपर्ने जनाइएको छ’, उहाले भन्नुभयो । समितिले हाल टुकुचा संरक्षण गर्नुपर्ने उल्लेख गरेको छ ।
‘टुकुचा सुरूङ राणाकालीन समयमा बनेको संरचना हो,’ उहाले भन्नुभयो, ‘हाल उक्त संरचना संरक्षण गर्नुपर्छ । अझ यसको थप विस्तृत अध्ययन गर्नुपर्छ ।’ काठमाण्डौ महानगरपालिकाले टुकुचा खोला क्षेत्रमा डोजर चलाएका सबै ठाउँको स्थलगत भ्रमण गरी भौतिक अध्ययन गरेको थियो । काठमाडौं महानगरपालिकाले सय वर्षभन्दा पुरानो पुरातात्विक सम्पदा कसैले पनि भत्काउन–बिगार्न नपाइने कानुनविपरीत जथाभावी डोजर चलाउन थालेपछि पुरातत्व विभागले विज्ञ समिति गठन गरेर अध्ययन गरेको थियो ।