देश विकास

एसिसी यु १९ एसिया कपको तयारीमा रहेको नेपाली यु १९ क्रिकेट टोलीले दोस्रो अभ्यास खेलमा जित निकालेको छ । नेपालका लागि सागर ढकालले ५ विकेट लिँदा श्रीलंकाको बदुरालिया सिसी ८० रनले पराजित भएको हो ।

पहिले ब्याटिङ गरेको नेपालले ४६ ओभर ४ बलमा सबै विकेट गुमाउँदै २ सय ६ रन बनाएको थियो । दोस्रो इनिङअघि खेल बर्षाले प्रभावित बनेपछि बदुरालियाले ३१ ओभरमा १ सय ६५ रनको लक्ष्य पाएको थियो । बदुरालिया केवल ८४ रन बनाउँदा नै अलआउट भएपछि नेपालको जित सम्भव भएको हो ।

नेपालका सागर ढकालले ५ ओभर १ बलमा १८ रन दिएर ५ विकेट लिए भने पवन सर्राफ र कमल सिंह ऐरीले २/२ विकेट लिए । कुशल मल्लले १ विकेट लिए ।

यसअघि नेपालका लागि रित गौतमले ७६ रन, हरि बहादुर चौहानले ५६ रन, सन्दीप जोराले २४, आशिफ शेखले १४ र भिम सार्कीले १० रन जोडेका थिए ।

पहिलो अभ्यास खेलमा नेपाल सिन्हालिज स्पोर्टस् क्लब यु २३ टिमसँग तीन विकेटले पराजित भएको थियो । नेपालले तेस्रो अभ्यास खेल शुक्रबार चिल्ल मारियन्ससँग खेल्नेछ । एसिसी यु १९ एसिया कप सेप्टेम्बर ५ देखि १४ सम्म श्रीलंकामा नै आयोजना हुँदैछ।