Saroj Poudel
काठमाडौं । आर्थिक विषयमा कलम चलाउने राजनीतिक विश्लेषक अच्युत वाग्लेको ट्वीटका कारण अहिले बौद्धिक क्षेत्रमा एक किसिमको हलचल नै उत्पन्न गराएको छ ।
नेपाल राष्ट्र बैंक र अख्तियार दुरुपयोग अनुसन्धान आयोग लगायतमा सल्लाह सुझावसमेत दिएर काम गरिसकेका उनले नेपालका राष्ट्रपति, उपराष्ट्रपति, प्रधानमन्त्री र परराष्ट्रमन्त्रीबारे नयाँ तथ्य बाहिर ल्याए । जसले बौद्धिक जमातको मानसपटललाई हल्लाएको छ ।
एक ट्वीटेको प्रश्नमा बिहीबार विश्लेषक वाग्लेले राष्ट्रपति, उपराष्ट्रपति, प्रधानमन्त्री र परराष्ट्रमन्त्रीको शैक्षिक योग्यताबारे आफ्नो भनाई सार्वजनिक गरेका हुन् । यसबारेमा राष्ट्रपति, उपराष्ट्रपति र प्रधानमन्त्री कार्यालयले कुनै खण्डन गरेको प्राप्त भएको छैन तर नवनियुक्त परराष्ट्रमन्त्री प्रदीप ज्ञवालीले भने ट्वीटमार्फत नै यसको जवाफ दिएका छन् ।
ट्वीटमा ज्ञवालीले आफ्नो शैक्षिक योग्यता यति हो भनेर उल्लेख गरेका छैनन्, तर आफ्नो शैक्षिक योग्यताबारे शब्द खर्चेको भन्दै उनले वाग्लेलाई धन्यवाद दिएका छन् ।
वाग्लेले ट्वीटमा लेखेका थिए, ‘नेपालको यो बिशेषता कारण छ्न् । राष्ट्रपति आइए फेल, प्रधानमन्त्री एसएलसी फेल, उपराष्ट्रपति टेस्ट फेल र परराष्ट्र मन्त्री नौ कक्षा फेल तर तिनले नै सत्ता चलाउने देश बिरलै छ्न्। उनीहरुको पदको रवाफ र बुद्धिको सर्कस देखाउने ठाँउ उद्घाटन समारोह भन्दा अर्को छैन ।’
यसलाई पराराष्ट्रमन्त्री ज्ञवालीले ट्वीटमार्फत यसरी जवाफ फर्काए, ‘धन्यवाद वाग्ले सर, मेरो पढाइबारे केही शव्द खर्चिनु भएकोमा । सुकरातले भनेका थिए रे–म एउटै क़ुरा जान्दछु, त्यो के हो भने म केही पनि जान्दिनँ । उनको यही भनाइले मलाई प्रेरित गरिरहन्छ र म सरहरूसँग सिकिरहन चाहन्छु, ज़िन्दगी भर ।’
Upendra Adhikari
