एक्कासी फुटपाथमा भ्यान उक्लियो र हिडिरहेका मानिसलाई किच्न थाल्यो :प्रत्यक्षदर्शी
एजेन्सी । क्यानडाको टोरन्टो शहरमा एक व्यक्तिले फुटपातमा जथाभावी भ्यान चलाएर १० जनाको हत्या गरेका छन् । यो घटनामा १५ जना घाइते भएका छन् । घटनामा संलग्न व्यक्तिलाई घटना भएको स्थान भन्दा केही परबाटै प्रहरीले नियन्त्रणमा लिएको छ ।
टोरन्टो प्रहरीले घटनाका प्रत्यक्षदर्शीलाई छानबिनमा सहयोग गर्न अपिल गरेको छ । प्रहरीले यो घटनाको अनुसन्धान लम्बिन सक्ने पनि बताएका छन् । घटना बे कारण भयो भन्ने बारे केही खुलाइएको छैन ।
एक प्रत्यक्षदर्शीले एक्कासी मानिसहरु चिच्चाएको आवाज सुनेको बताउँदै सेतो रंगको भ्यान एक्कासी फुटपातमा उक्लिएको र त्यहाँ हिडिरहेका मानिसलाई किच्न थालेको जानकारी गराएका छन् ।
यो घटना भएको ठाउँ नजिकै मेट्रो सेवा स्थगित गरिएको छ । प्रहरीले त्यो इलाका नजिकै नजान पनि सबैलाई आग्रह गरेको छ ।
