एक सय रुपैयाँ दिने भन्दै एक व्यक्तिद्वारा दुई बालिका बलात्कार
कञ्चनपुर, २१ चैत । पछिल्लो समय दिनानुदिन बलात्कारका घटनाहरु बढीरहेको छ । कही दोषीलाई कारवाही गरिएको छ त कही दोषी फरार रहेका छन् । जबसम्म बलात्कारीलाई कानुनी कडा कारवाही हुँदैन तबसम्म बलात्कारका घटनाहरु दोहोरिरहन्छन् ।
बलात्कार घटनाको पछिल्लो शिकार बनेका छन् कञ्चनपुरका दुई बालिका भीमदत्त नगरपालिका १० जिमुवामा एक व्यक्तिले ७ वर्षिया र ८ वर्षिया दुई बालिकालाई पैसाको प्रलोभन देखाएर बलात्कार गरेका छन् । विद्युतीय रिक्सा चलाउने स्थानीय २१ वर्षिय किसन नाथले उनीहरुलाई बलात्कार गरेको प्रहरीले जनाएको छ ।
नाथले सोमबार सॉझ आफ्नै रिक्सामा दुवै वालिकालाई घरभन्दा केहि पर भारतीय जंगल क्षेत्रमा लगी बलात्कार गरेको पीडितका आफन्तले जनाएका छन् ।
घट्ना भएको दोस्रो दिन सॉझ दिशा पिशाव गर्न समस्या भएको भन्दै आपसमा कुरा गरिरहेका बेला अभिभावकले सुनेपछि घटना सार्वजनिक भएको हो । अभिभावकले सोधपुछ गर्दा वालिकाहरुले घट्नाबारे जानकारी दिएको अभिभावकले बताएका छन् ।
दुवै जनालाई ५०/५० रुपैयाँ दिएर पालैपालो वलात्कार गरेको र त्यसपछि पैसा पनि खोसेर लगेको बालिकाहरुले बताए ।
नाथले सोमबार सांझ ७ बजे घरको आगनबाटै दुवै वालिकालाई आफ्नै रिक्सामा राखेर लगेको केहीले देखेका पनि हुन् तर नाथ पनि सोही स्थानको भएकाले बालिकासँग रिक्सामा हिडेको देखेर पनि कसैले वास्ता गरेनन् ।
जब घटना सार्वजनिक भयो ईलाका प्रहरी कार्यालय गड्डाचौकीका इन्चार्ज सई डिकरदेव पन्तको टोलीले नाथलाई उनकै घरबाट पक्राउ गरे । नाथले प्रहरीमाथि समेत हातपात गरेको प्रहरीले बताएको छ । तत्कालै दुवै वालिकाको मेडिकल परीक्षण गरिएको छ । बाहिरी रुपमा वालिकाहरुको स्वास्थ्य सामान्य रहेको र मेडिकल रिपोर्ट आएपछि मात्रै थप जानकारी हुने प्रहरीले बताएको छ ।
फागुन अन्तिम् साता पनि कञ्चनपुरकै कृष्णपुर नगरपालिकाको मौरीफांटामा स्कुल जानेक्रममा एक किशोरीलाई वलात्कर गरिएको थियो। उक्त घट्ना भएको साता दिन नबित्दै पुनर्वास नगरपालिकाको ङ गाउँमा पनि डेढ वर्षीया वालिका वलात्कृत भएकी थिइन् ।
