देउवा र सिंहको बाझाबाझा, सभापति नै रिसले उठेपछि बिग्रियो माहोल

नेपाली कांग्रेसको शुक्रबारदेखि सुरु केन्द्रीय कार्य समितिको बैठकमा सभापति शेरबहादुर देउवा र पूर्व महामन्त्री प्रकाशमान सिंहबीच बाझाबाझ भएको छ ।

मर्यादा क्रममा विवाद बढ्दै जाँदा बैठकमा नै सभापति देउवा र सिंहको बाझाबाझा भएको हो । बैठकमा नेता गोपालमान श्रेष्ठलाई पदाधिकारीपछिको पहिलो नम्बरमा राख्ने प्रस्ताव राखिएपछि विवाद सुरु भएको हो । पूर्व महामन्त्री प्रकाशमान सिंहले तीब्र असन्तुष्टी जनाउँदै विरोध गरेपछि देउवाले हकारे । जवाफमा सिंहले पनि कड्कीएका थिए ।

सभापति समेत रहेका देउवाले आक्रोशित हुँदै जुरुक्क उठेपछि बैठकको माहोल गरमागरम भएको थियो । सभापति जस्तो भएर यसरी आक्रोशित हुन नहुने भन्दै अन्य नेताले थुमथुमाए पछि तात्तिएको माहोल केहि सेलायो । मर्यादा क्रमको विषयमा फेरि पनि छलफल गरौँ भन्दै सहमति गरे पछि बैठकको वातावरण शान्त भएको थियो ।

शुक्रबारदेखि सुरु बैठक आज आइतबार भने बसेको छैन । आइतबार चैते दशैं र रामनवमी पर्व परेकाले बैठक नबसेको हो । सोमबार फेरि मर्यादाक्रमकै विषयबाट बैठक सुरु हुने एक नेताले बताए । कांग्रेसमा वरियताको विवाद यस अघि पनि देखिएको थियो । विवाद साम्य पार्न भन्दै केन्द्रीय सदस्य ज्ञानेन्द्रबहादुर कार्की नेतृत्वमा समिति समेत गठन गरिएको थियो । तर विना कुनै जानकारी बैठकमा एक्कासी श्रेष्ठको नाम पदाधिकारीपछिको पहिलो नम्बरमा राख्न प्रस्ताव गरेपछि विवाद बढेको हो ।

एउटा नेतालाई मात्रै प्राथमिकता दिँदै निर्णय गरेको भन्दै सिंह र कृष्णप्रसाद सिटौला पक्षले तीब्र असन्तुष्टि जनाएको छ । श्रेष्ठले भने रामचन्द्र पौडेलपछिको वरीयताक्रम दाबी गर्दै १३औं महाधिवेशनपछि केन्द्रीय समिति बैठकहरूमा उपस्थित भए पनि निर्णय पुस्तिकामा हस्ताक्षर गरेका छैनन् । गुट र उपगुटमा झेलिएकै कारण पार्टी दुर्गन्धित भएको कार्याकर्ताको गुनासो छ ।