देश विकास

धादिङ । धादिङको धुनिवेशी नगरपालिकामा आयोजित बृहत् बहु–विशेषज्ञ स्वास्थ्य शिविरबाट ६ सय ४१ जना लाभान्वित भएका छन्।

धुनिवेशी नगरपालिका र स्वास्थ्य सहयोग नेपाल गुठीको संयुक्त आयोजनामा नौबिसे स्वास्थ्य चौकीमा शनिबार सम्पन्न शिविरमा बालरोग, हाडजोर्नी, स्त्रीरोग, छाला रोगलगायत विभिन्न स्वास्थ्य समस्याका बिरामीलाई विशेषज्ञ चिकित्सकमार्फत निःशुल्क परामर्श, परीक्षण तथा आवश्यक उपचार सेवा प्रदान गरिएको नौबिसे स्वास्थ्य चौकीका प्रमुख गीता भट्टले जानकारी दिनुभयो।

स्वास्थ्य चौकी सञ्चालन समितिका सदस्य प्रमोद पाठकको अध्यक्षतामा भएको कार्यक्रममा नगर प्रमुख बालकृष्ण आचार्य, उपप्रमुख सुरज उप्रेती, प्रमुख प्रशासकीय अधिकृत विनोदकुमार खनाल, स्वास्थ्य सहयोग नेपाल गुठीका अध्यक्ष विष्णुहरी सुवेदी, उपाध्यक्ष सुबोध अधिकारी तथा स्वास्थ्य शाखा प्रमुख धुर्वकुमार अधिकारीलगायतको सहभागिता रहेको थियो।