Saroj Poudel
काठमाडौ, २८ चैत । प्रधानमन्त्री केपी शर्मा ओलीले आफूने कुनै पनि हालतमा नेपालमा रेल भित्र्याउने दावी गरेका छन् ।
उद्योग वाणिज्य महासंघको ५२ औं वार्षिक साधारणसभाको कार्यक्रममा बोल्दै प्रधानमन्त्री ओलीले रेलमा सामान आयात भएअनुरुप निर्यात पनि हुनसक्ने बताए । प्रधानमन्त्री ओलीले उद्योगीहरुलाई विदेश निर्यात गर्ने सामानको उत्पादन तीव्र रुपमा गर्न समेत सुझाव दिए । त्यसका लागि सरकारले गर्नुपर्ने सहयोगबाट आफू नचुक्ने पनि आश्वासन दिए ।
प्रधानमन्त्रीले भने ‘रेल देशमा आउँदा भरी, जाँदा रित्तै नहोस्, त्यसैले अब बाहिर पठाउने सामानको उत्पादन बढाउनुहोस्, त्यसमा नीति नियमका लागि सरकारले के कति सहयोग गर्नुपर्छ त्यो म गर्नेछु ।’
देशमा सञ्चालित उद्योगधन्दामा पुराना मेसिहनहरु भएकाले उत्पादिन सामानहरु हुने गरेको भन्दै अब आधुनिक खालका मेसिनहरु जडान गरी उत्पादन वृद्धि गर्न उनले सुझाव दिए । उनले भने, ‘आधुनिक मेसिनहरु जडान गर्नुहोस्, उत्पादन वृद्धि गर्नुहोस् अनि मात्रै विश्व बजारमा प्रतिस्पर्धा गर्न सकिन्छ ।’
कृषि र उद्योग दुवै क्षेत्रले आधुनिक प्रविधिको प्रयोग गरेर उत्पादन बढाउन सक्ने उनको भनाई छ । अहिले देशको व्यापार घाटाको अवस्था कहालिलाग्दो रहेको भन्दै उनले भने ‘अहिलेसम्म देशबाट निर्यात नै हुँदैन, केको व्यापार घाटा, यो त किनेको मात्रै हो ।’
प्रधानमन्त्री ओलीले देशमा अहिलेसम्म आयात मात्रै हुने गरेकोले अब निर्यातको वातावरण बनाउन उद्योगी व्यवसायीहरुलाई आग्रह गरे । देशमा प्रशस्त मात्रमा उत्पादन भए निर्यात गर्न सकिने र आर्थिक विकास आफै हुने उनको दावी छ ।
Upendra Adhikari
