पूर्व राजा ज्ञानेन्द्रकी भतिजीलाई नागरिकताको सिफारिस लिनै पर्‍याे सास्ती

काठमाडौं, १३ वैशाख । पूर्वराजा ज्ञानेन्द्र शाहकी भतिजि श्रेया राज्यलक्ष्मी शाहले नेपाली नागरिकताका लागि गरेको प्रयासमा अझैसम्म सफल हुन सकेको छैन ।

काठमाडौं–३ का वडाध्यक्ष दिपक केसी शाहको नागरिकताका लागि सिफारिस दिन आनाकानी गर्दा शाहलाई नागरिकता लिन सास्ती भइरहेको छ । केसीले श्रेयाको नागरिकताका लागि सिफारिस नै गरेका छैनन् । उनले नागरिकताका लागि बाबुको उपस्थिति अनिवार्य रहेको बताउँदै आएका छन् । श्रेयाका बाबु धीरेन्द्र शाह १९ जेठ, ०५८ को दरबार हत्याकाण्डमा मारिएका थिए ।

धीरेन्द्र पत्नी तथा श्रेयाकी आमा जया पाण्डे छोरी लिएर नागरिकता सिफारिसका लागि केसीलाई भेट्न पुगेका थिए । केसीले अपमानजनक व्यवाहार गरेर फर्काएको बताइएको छ । ‘छोरीले बाउ खोज्नुभन्दा पहिला आमाले पोइ पति खोज्नु पर्छ । नेपालको कानुन सबैले पढ्नु पर्‍यो नि’, केसीले भने । त्रिवि शिक्षण अस्पतालमा जन्मिएको जन्म प्रमाणपत्रमा बाबुको नाम धीरेन्द्रवीरविक्रम शाह छ, त्यसबाट उनी तत्कालीन अधिराजकुमार धीरेन्द्रकी छोरी भएको स्पष्ट हुन्छ ।

तर केसीले छोराछोरी पाउँदैमा नागरिकता नपाइने भन्दै त्यसका लागि कानुनी बाध्यतालाई अध्ययन गर्न सुझाएका छन् । जया धीरेन्द्रकी दोस्री पत्नी हुन् । उनीबाट श्रेयाको जन्म भएको थियो । पहिली पत्नी प्रेक्षाको दरबार हत्याकाण्डको केही समयपछि रारा तालमा हेलिकोप्टरबाट खस्दा डुबेर निधन भएको थियो । प्रेक्षा शाहसँग सम्बन्धविच्छेद भएपछि वि.सं. २०४४ सालमा धीरेन्द्रले दक्षिणकाली मन्दिरमा गई बत्तीसपुतलीकी जया पाण्डेसँग विवाह गरेका थिए । २०४५ साल असार २ गते शिक्षण अस्पताल महाराजगन्जमा श्रेया शाहको जन्म भएको थियो ।