देश विकास

धादिङ । नेपाल मानव अधिकार वर्ष पुस्तक २०२३ प्रकाशन पूर्व जिल्लामा वार्षिक पूर्व समीक्षा कार्यक्रम गरिएको छ । नेपाल मानव अधिकार वर्ष पुस्तक २०२३ प्रकाशनका लागि जिल्लामा इन्सेकले अभिलेखीकरण गरेको घटनाबारे पृष्ठपोषण तथा सुझाव सङ्कलन गर्नका लागि वार्षिक समीक्षा गरिएको हो ।
अनौपचारिक क्षेत्र सेवा केन्द्र (इन्सेक) ले मंगलबार धादिङबेसीमा सरोकारवाला बीच सार्वजनिक गरेको तथ्याङ्क अनुसार ३६ ओटा घटना रहेका छन् । समीक्षा कार्यक्रममा धादिङका लागि इन्सेक प्रतिनिधि सीताराम अधिकारीले प्रस्तुत गर्नुभएको घटना विवरणमा निर्वाचन लक्षित कुटपिट झडपको घटना १२, बलात्कार ३ ओटा, बलत्कारको प्रयास १ ओटा, बाल यौन दुर्व्यवहारका पाँच ओटा, हत्या २ वटा लगायतका रहेका छन् ।
कार्यक्रममा जिल्ला समन्वय समितिका प्रमुख नवराज अधिकारीले मानव अधिकारको आधारभूत विकास गर्न कानुन न्यायको दृष्टिले सबैले आफ्नो जिम्मेवारी पूरा गरेको खण्डमा मानव अधिकारको रक्षा गर्न सहज हुने बताउनुभयो । उहाँले इन्सेकले अभिलेखीकरणले समाजमा मानव अधिकारको अवस्था के कस्तो छ भन्ने चित्रण गरेको बताउनुभयो । नेपाल मानव अधिकार वर्ष पुस्तक २०२३ का लागि आर्थिक, सामाजिक, सांस्कृतिक अधिकारका विषय पनि समावेश गर्न सहभागीले सुझाव दिएका छन् । इन्सेकले प्रहरी प्रशासनन, स्थानीय तह सँग सहकार्य गरेर थप प्रभावकारी कार्यक्रम बनाउन र राष्ट्रिय परिचयपत्र र नागरिकता, राहदानी बनाउन नागरिकल भोगेको सास्ती प्रति पनि चासो दिन समेत सुझाव दिएका छन् । कार्यक्रममा विभिन्न सरकार तथा गैर सरकारी निकाय पत्रकार, सामाजिक अभियान्ता, नागरिक समाजका प्रतिनिधि लगायतको सहभागिता रहेको थियो ।