Deepa Poudel
काठमाडौं, ४ वैशाख । रातो मच्छिन्द्रनाथको रथ बनाउने काम अन्तिम चरणमा पुगेको छ ।
यवाल गुथियारहरुले रथमा बेतले बाध्ने काम गरेका छन् । मूर्तिलाई रथारोहण गर्नु अघि सुनका फूल, झयाल, कौसी, धमा जडान गरिने रथ निमार्णमा संलग्न बाराही नाइके दिलकुमार बाराहीले बताउनुभयो ।
चित्रकार समुदायले ह्यग्रिभ भैरवको अनुहार कोरेपछि मात्र रथको अगाडि भागमा रहने लामो काठ धमालाई रथमा जडान गरिने उहाँले बताउनुभयो ।
रथको रक्षाको लागि ककोर्टक नागले भैरवको मुखटा लगाएर रथको अगाडि बस्ने जनविश्वास छ । रथारोहण गरेर विहीवारदेखि रातो मच्छिन्द्रनाथको रथयात्रा शुरु हुनेछ ।
रातो मच्छिन्द्रनाथको रथको अघिपछि लगाएर तानिने मीननाथको रथमा यवाल गुथियारहरुले बेतले बाध्ने काम गरिरहेका छन् ।
मच्छिन्द्रनाथको रथ ललितपुरको पुल्चोकमा बनाइन्छ भने मीमनाथको रथ टंगलमा बनाउने गरिन्छ ।
काठमाडौं उपत्यकामा खडेरी परेको बेला त्यसबेलाका राजा नरेन्द्रदेव , तान्त्रिक बन्धुदत्त बज्राचार्य र ललितज्यापुले भारतको कामारुकामाक्षबाट रातो मच्छिन्द्रनाथ ल्याएको जनविश्वास छ । त्यहिप्रतिक स्वरुप हरेक वर्ष कटुवाल दहबाट देवता ल्याउने गरिन्छ ।
रथको माथिल्लो भागमा रहने धकिबाँयम्व राखेपछि मूर्तिलाई रथमा राखिने पुजारी विनोद बज्राचार्यले बताउनुभयो ।
Upendra Adhikari
