हेडसरले नै विद्यार्थी कुट्दै पिसाव खुवाएपछि….

रामेछाप, ५ जेठ । विद्यालयमा शिक्षकहरुको समन्वय गर्ने, पढाइको वातावरण मिलाउने र विद्यार्थीहरुलाई पढ्नका लागि उत्साहित बनाउने काम हेडसरको हो ।

शिक्षकले कहिलेकांही भुलबस् बाटो विराए वा विद्यार्थीहरुमाथि अनावश्यक कार्वाही गरे त्यसलाई समयमै नियन्त्रण गर्ने काम पनि हेडसरको हो । तर, रामेछापको खिु तामाकोशी गाउँपालिकास्थित झट्टेश्वर माविका प्रधानाध्यापक केवलबहादुर तिम्सिनाले भने कल्पनाभन्दा बाहिरको काम गरेका छन् । प्रधानध्यापक तिमिल्सिनाले आफ्नै विद्यार्थीलाई निर्घात कुटपिट गरी पिसाव खुवाएर यातना दिएको खुलासा भएको छ ।

पीडित विद्यार्थीहरुले प्रधानाध्यापकको अत्याचार सहन नसकी शुत्रबार धोवी प्रहरी कार्यालयमा उजुरी दिएपछि यातनाको यो कुरा बाहिरिएको हो । गाउँपालिका अध्यक्ष गोविन्दबहादुर खड्काका अनुसार प्रधानाध्यापक तिमिल्सिनाले कक्षा ७ मा पढ्ने बुद्ध तामाङ र लाक्पा तामाङलाई निर्घात कुटपिट गरी पिसाव पिउन बाध्य बनाएको पाइएको छ ।

प्रधानध्यापक तिमिल्सिनाले आफूले उश्रृंखल गतिविधि गर्ने विद्यार्थीलाई सामान्य कार्बाही गरेको दाबी गरेका छन् । उनका अनुसार जेठ १ गते कक्षा ७ मा अध्ययनरत विद्यार्थीहरु बुद्ध तामाङ, लाक्पा तामाङ र गणेश बुढाथोकी मिलेर आफ्नै साथी साङवीर तामाङलाई मिनरल वाटर बोतलमा पिसाव र थुक मिसाएर खुवाएको खुलेपछि उनीहरुलाई पनि त्यही पानी पिउन दिएको जिकिर गरेका छन् ।

पिसाव पिउन नमानेपछि पाइपको टुक्राले सामान्य हिर्काएको उनले दावी गरे । कार्बाहीका क्रममा बोतलको पानी बुद्ध र लाक्पाले पिए पनि गणेशले पिउन नमानेपछि पिसाव नै भएको विद्यार्थीले स्वीकारेको उनले बताएका छन् ।
यस्तै प्रधानध्यापक तिमिल्सिनाले अर्का कक्षा ९ मा अध्ययनरत ममिता तामाङलाई जेठ २ गते आफ्नै साथीसँग झगडा गरेको भन्दै निर्घात कुटपिट गरेको खुलेको छ । यता विद्यालय व्यवस्थापन समितिले शुक्रबार छलफलको लागि बैठक डाकेको थियो ।

प्रधानध्यापक बैठकमा नआएपछि बहुमतको आधारमा विद्यालय शिक्षकहरुको सहभागितामै प्रधानध्यापक पदबाट हटाइएको गाउँपालिका अध्यक्ष गोबिन्दबहादुर खड्काले जानकारी दिए । उनका अनुसार अब प्रहरीमा संयुक्त उजुरी दिई कार्बाहीको सिफारिस गरिने उनले बताए । प्रधानध्यापक तिमिल्सिनाले भने आफूलाई विद्यालय ब्यवस्थापन समितिको बैठकबारेमा केही थाहा नभएको बताउँदै गाउँपालिका अध्यक्ष र वडाअध्यक्षसँग राम्रो सम्बन्ध नरहेकै कारण घटनालाई तोडमोड गरेर हटाउन खोजेको आरोप लगाएका छन् ।

तस्विर : साके‌तिक