२ नम्बर प्रदेशमा आज सार्वजनिक बिदा, जनकपुरमा उल्लास

महेन्द्रनगर, धनुषा, ११ वैशाख । २ नम्बर प्रदेशमा आज सार्वजनिक बिदा दिइएको छ । प्रदेश सरकारले आज जनकपुरमा मनाइने जानकी नवमीको अवसरमा २ नम्बर प्रदेशका ८ जिल्लामा सार्वजनिक बिदा दिने निर्णय गरेको हो ।

आज जानकीको जन्मजयन्ती परेकाले प्राचीन मिथिलाको राजधानी जनकपुरधाममा हर्षोल्लासका साथ मनाइँदैछ । जानकीको वैशाख शुक्ल नवमी तिथिमा मिथिलाको पुनौरा भन्ने स्थानमा जन्म भएको थियो । त्यसैले यस तिथिलाई जानकी नवमी पनि भनिन्छ ।

जानकी नवमीको अवसरमा जनकपुरधामको जानकी मन्दिरसहित मिथिलाञ्चलमा ठाउँठाउँमा ठूलो धार्मिक मेला लाग्ने गरेको छ । जनकपुरधामको नौलखा मन्दिरमा बिहानैदेखि पूजा–पाठ गर्ने भक्तजनको घुँइचो लागेको छ ।

आन्तरिक मामिला तथा कानून मन्त्रालयका प्रशासन महाशाखाका उपसचिव रोहित दाहालका अनुसार छठपर्व र होलीमा दुई–दुई दिन सार्वजनिक बिदा हुनेछ । छठपर्व र फागुपूर्णिमामा बिदा दिने संघीय सरकारले निर्णय गरेको छ । प्रदेश सरकारले दुवै पर्वको अघिल्लो दिन पनि बिदा दिने निर्णय गरेको दाहालले बताए ।

जानकी नवमी, जनैपूर्णिमा, विवाहपञ्चमी र रामनवमीमा बिदा दिइनेछ । मधेश आन्दोलन स्मृति दिवस माघ ५ गते पनि सार्वजनिक बिदा दिने निर्णय भएको छ ।

आन्तरिक मामिला तथा कानून मन्त्रालयका अनुसार इस्लाम धर्मावलम्बीले मनाउने पैगम्बर हजरत मोहम्मद सल्लाहु वलैहे वसमको जन्मदिन ९वारह रविउल्ल औयल०को दिन पनि बिदा दिइने बताइएको छ ।