७९ वर्षीया वृद्धा बलात्कार गर्ने २३ वर्षीय युवक पक्राउ
इलाम, १९ वैशाख । इलामकी ७९ वर्षीया वृद्धालाई बलात्कार गरेको अभियोगमा २३ वर्षीय युवक पक्राउ परेका छन् ।
पक्राउ पर्नेमा झापा वृद्धशान्ति गाउँपालिका–१, का २३ वर्षीय सुदीप गुरुङ रहेको जिल्ला प्रहरी कार्यालय इलामले जनाएको छ । गुरुङलाई प्रहरीले उनको घरबाटै पक्राउ गरेको जनाएको छ । घटनामा अन्यको पनि संलग्नता रहेको देखिएकाले अन्यको पनि खोजी भइरहेको प्रहरीले जानकारी दिएको छ ।
इलामको रोङ गाउँपालिका–१, शान्तिपुरका ७९ वर्षीया वृद्धा गत सोमबार सामुहिक बलात्कार शिकार बनेकी थिइन् । घरमा एक्लै सुतिरहेका बेला अज्ञात समूहले उनलाई बलात्कार गरी वृद्धाको जिब्रो समेत काटिदिएका थिए ।
पीडित वृद्धाको झापाको बिर्तासिटी हस्पिटलमा उपचार भइरहेको छ ।
