देश विकास

काठमाडौं । अर्जेन्टिना र पोल्यान्ड कतारमा जारी फिफा विश्वकप फुटबलको नकआउट चरणमा प्रवेश गरेका छन् । समूह ‘सी’ अन्तर्गत स्टेडियम ९७४ मा बुधबार राति भएको खेलमा अर्जेन्टिनाले पोल्यान्डलाई २–० गोलले हरायो । हारेपनि पोल्यान्ड समूह उपविजेता बन्दै अन्तिम १६ मा पुगेको हो । अर्जेन्टिना समूह विजेता बन्यो । अर्जेन्टिनाको जितमा एलेक्सिस म्याक एलिस्टर र जुलियन अल्भारेजले गोल गर्नुभयो ।
एलिस्टरले ४६औँ र अल्भारेजले ६७औँ मिनेटमा गोल गर्नुभएको थियो । यसअघि ३९औँ मिनेटमा कप्तान लियोनल मेस्सी पेनाल्टीमा गोल गर्न चुक्नुभयो । जितसँगै समूहको शीर्षस्थानमा रहेको अर्जेन्टिनाले ६ अङ्क बनायो । उपविजेता पोल्यान्डले चार अङ्क जोड्यो । यस समूहबाट मेक्सिको र साउदी अरब बाहिरिए । बुधबार राति नै भएको खेलमा मेक्सिकोले साउदी अरबलाई २–१ गोलले हराएको थियो । जितसँगै चार अङ्क बनाएको मेक्सिको तेस्रो र तीन अङ्क बनाएको साउदी अरब अन्तिममा रह्यो । एजेन्सी