कपिल शर्मालाई अर्को झट्का, तीन एपिसोडपछि नै नयाँ शो बन्द हुने

एजेन्सी, २८ चैत । लामो समयदेदखि विवादित रहेका कमेडियन कपिल शर्माको नयाँ शो ‘फेमिली टाइम विथ कपिल शर्मा’ बन्द हुने भएको छ । खबरहरुका अनुसार सोनी च्यानलमा मात्र तीनवटा एपिसोड पछि बन्द हुने फैसला भएको छ ।

एक चर्चित वेभसाइटलाई उद्धृत गर्दै भारतीय सञ्चार माध्यमले कपिलको अव्यवसायिक रवैयाको कारण च्यानलले सोमबार उक्त शो बन्द गर्ने निर्णय गरेको हो ।

कपिल केही समयदेखि एकदमै कठिन अवस्थादेखि गुज्रिरहेका छन् । केही दिन अघि उनले एउटा इन्टरटेन्मेन्ट वेभसाइटको एडिटरलाई गाली गरेका थिए । कपिलले त्यस वेभसाइटले आफ्नो विरुद्धमा नकरात्मक खबरहरु छापेको आरोप लगाएका थिए ।

यस अघि पनि कपिलले आफ्नी कथित पूर्व प्रेमिका प्रिती सिमोस र उनी बहिनी निती सिमोसलाई आफ्नो २५ लाख रुपयाँ खान खोजेको आरोप लगाउँदै उजूरी दर्ता गरेका थिए ।

मिडियाहरुको अनुसार कपिल अहिले डिप्रेशनबाट गुज्रिरहेका छन् जसकारण उनी अहिले सुटिङ सेटमा राम्ररी समय दिन सकिहरेका छैनन् । यसैक्रममा उनकी कथित पूर्व प्रेमिका प्रिती सिमोसले  कपिलको मानसिक अवस्था ठिक नभएको बताएकी छिन् । उनले कपिललाई सिजोफ्रेनिया भएको हुनसक्ने र उनले धेरैपटक आत्महत्याको कुरा गरेको बताएकी छिन् ।

मार्च २०१७ सम्म प्रिती कपिलको प्रोडक्सन हाउस के ९ को क्रिएटीभ डायरेक्टरको रुपमा काम गर्थिन् । कपिल र सुनिल ग्रोबरबीच झगडा भएपछि उनी शोबाट निस्किएकी थिइन् । उनीहरुसँगै काम गर्दा दुबैको अफेयर रहेको खबरहरु मिडियामा आएका थिए । तर मार्च २०१७ मा कपिलले सामाजिक सञ्जालमार्फत गिन्नी चतरथलाई आफ्नो हुनेवाला श्रीमती भनेर सार्वजनिक गरेपछि उनीहरुको सम्बन्धमा तितोपना आएको थियो ।