गल्छी गाउँपालिकाद्धारा विद्यालय समायोजन, कुन-कुन विद्यालय तथा बालविकास केन्द्र समायोजन भए ?
गल्छी गाउँपालिकाले विद्यालय समायोजन तथा व्यवस्थापन सम्बन्धी सूचना जारी गर्दै विभिन्न विद्यालय र बालविकास केन्द्र समायोजन गरेको छ । गाउँ शिक्षा समितिको २०८३ जेठ ८ गते बसेको बैठकको निर्णयअनुसार “सार्वजनिक विद्यालय समायोजन तथा एकीकरण कार्यक्रम कार्यान्वयन कार्यविधि, २०७७” अनुसार विद्यालय समायोजन प्रक्रिया अघि बढाइएको गाउँपालिकाले जनाएको छ ।
शिक्षा अधिकृत धिरज बस्नेतका अनुसार विद्यार्थी संख्या, शैक्षिक अवस्था तथा व्यवस्थापनलाई आधार मानी समायोजन गरिएको हो । उहाँका अनुसार ९ वटा विद्यालय तथा बालविकास केन्द्रलाई अन्य विद्यालयमा समायोजन गरिएको छ भने एउटा विद्यालयमा बालविकास कक्षा मात्र सञ्चालन हुने व्यवस्था गरिएको छ ।
समायोजन भएका विद्यालयहरूमा कालिदेवी आधारभूत विद्यालय, सुन्टार आधारभूत विद्यालय, रिपछाप बालविकास केन्द्र, शिवालय आधारभूत विद्यालय, धादिङ आधारभूत विद्यालय, भैरवी आधारभूत विद्यालय, बागेश्वरी आधारभूत विद्यालय, असारे आधारभूत विद्यालय र ठाँटीचौर आधारभूत विद्यालय रहेका छन् ।
गाउँपालिकाले समायोजित विद्यालयका विद्यार्थीहरूको विवरण सम्बन्धित विद्यालयमा स्थानान्तरण गरिने जनाएको छ साथै चलअचल सम्पत्ति व्यवस्थापनका लागि सम्बन्धित वडा अध्यक्षको संयोजकत्वमा समिति गठन गरिने उल्लेख गरिएको छ ।
त्यस्तै समायोजित विद्यालयमा कार्यरत शिक्षक तथा कर्मचारी व्यवस्थापनका लागि शिक्षा, युवा तथा खेलकुद शाखामा उपस्थित भई तोकिएअनुसार विद्यालय छनोट गर्न आग्रह गरिएको छ ।
