Krishi Bihani
२९ चैत्र २०७७, आईतबार ।
धादिङको धुनिवेशी ६ धार्केमा मल, बीउ, बिजन तथा तरकारी खरिद बिक्रि केन्द्र स्थापना भएको छ । आफ्ना शेयर सदस्यहरुलाई सेवा पुर्याउने उदेश्यले जिवनपुर साना किसान कृषि सहकारी संस्थाले धार्के बजारमा आईतबारदेखि औपचारिक रुपमा सहकारी पसलको उद्धघाटन गरेको छ ।
जिवनपुर साना किसान कृषि सहकारी संस्थाका अध्यक्ष राजेश कुमार रुचालको अध्यक्षता, धुनिवेशी नगरपालिकाका प्रमुख बालकृष्ण आचार्यको प्रमुख आतिथ्यता, नगर उपप्रमुख निरु खरेल, वडा नं ५ का वडाध्यक्ष कृष्ण कुमार रेग्मीको आतिथ्यता रहेको कार्यक्रममा जिल्ला सहकारी संघ धादिङका अध्यक्ष रामचन्द्र आचार्य, नेपाल कृषि सहकारी केन्द्रीय संघका लेखा सदस्य अप्सरा अधिकारी लगायत विभिन्न संघसंस्थाका प्रतिनिधीहरुको सहभागिता रहेको थियो ।
उद्धघाटन कार्यक्रमका बिच जिवनपुर साना किसान कृषि सहकारी संस्थाका अध्यक्ष राजेश कुमार रुचालले बिचौलियाहरुको अन्त्य गर्दै पसलमा सर्वसुलभ तथा गुणस्तरिय सामान विक्रि वितरण गरिने बताउनुभयो । आफ्ना शेयर सदस्यहरुलाई सेवा सुविधा प्रदान गर्नका लागी समयमै मल, बिउ, बिजन उपलब्ध गराउने र उत्पादन गरिएका तरकारीजन्य पदार्थको उचित मूल्यमा नै खरिद बिक्रि हुने बताउनुभयो ।
कार्यक्रमका प्रमुख अतिथी तथा धुनिवेशी नगरपालिकाका प्रमुख बालकृष्ण आचार्यले रिबन काटेर पसलको उद्घाटन गर्नुहुदै सहकारीले गरेको यो काम प्रशंसनीय रहेको र भावी दिनहरुमा यस पसलले हरेक कृषकको मन जित्न सक्ने बनाउन आग्रह गर्नुभयो । कृषकले चाहेको समयमा मल, बिउ उपलब्ध गराउन सक्नुपर्ने र गोदामको उचित व्यवस्था हुनुपर्नेमा जोड दिनुहुदै कृषकको चाहना तथा आवश्यक्तालाई मध्यनजर गर्दै स्थापना भएको यस पसलको लागी धुनिवेशी नगरपालिका सहयोगका लागी सदैव तत्पर रहेको बताउनुभयो । साथै हिसावकिताव तथा लेखा राख्नका लागी कम्प्युटर प्रणालीको प्रयोग गर्नका लागी आग्रह गर्नुभयो ।
Upendra Adhikari
