Deepa Poudel
काठमाडौं, १५ जेठ । यस बर्षको ‘तेञ्जिङ्ग हिलारी पुरस्कार’ सगरमाथाको २२ पटक आरोहण गरी विश्व कीर्तिमान कायम गर्ने कामीरिता शेर्पालाई प्रदान गरिएको छ ।
एघारौं अन्तराष्ट्रिय सगरमाथा दिवसका अबसरमा मूल समारोह समितिले मंगलबार काठमाडौमा बिशेष कार्यक्रमको आयोजना गर्दे शेर्पालाइ उक्त पुरस्कार प्रदान गरिएको हो ।
त्यस्तै सगरमाथाको नौ पटक आरोहण गर्ने महिला ल्हाक्पा शेर्पा र उचाइ हेलिकप्टर उडान भर्ने क्याप्टेन सिद्धार्थ गुरुङलाई पनि ‘तेञ्जिङ हिलारी पुरस्कार’ पुरस्कार प्रदान गरियो ।
पुरस्कारको राशी जनही ५० हजार रुपैयाँ रहेको छ ।
त्यस्तै आरोहणमा दक्ष जनशक्ति उत्पादन गर्ने नेपाल माउन्टेनरिक इन्स्ट्रक्टर एशोसिएसनलाई एक लाख राशिको ‘राष्ट्रिय सगरमाथा पुरस्कार’ प्रदान गरियो ।
कार्यक्रममा खानेपानी मन्त्री बिना मगरले सगरमाथालगायत हिमाल आरोहण गरी नेपाललाई विश्वमा चिनाउने साहसी आरोहीलाई राज्यले विशेष सम्मान र सुविधा उपलब्ध गराउनुपर्ने बताउनुभयो ।
मन्त्री मगरले सगरमाथा चढाउने शेर्पाको जिम्मेवारीलाई महत्वपूर्ण रुपमा लिई तिनलाई आवश्यक सुविधाको व्यवस्था गरिनुपर्नेमा जोड दिनुभयो ।
त्यस्तै संस्कृति, पर्यटन तथा नागरिक उड्डयन मन्त्रालयका सचिव एवं मूल समारोह समितिका अध्यक्ष कृष्णप्रसाद देवकोटाले देशको गौरव, मान र शान सगरमाथाको संरक्षण र प्रवद्र्धनका लागि सरकारले कुनै कसूर बाँकी नराख्ने बताउनुभयो ।
नेपाल पर्वतारोहण संघका अध्यक्ष सन्तवीर लामाले पर्वतीय पर्यटनलाई व्यवस्थित गर्न सरकार र निजी क्षेत्रको साझेदारिता चाहिने उल्लेख गर्नुभयो ।
Upendra Adhikari
