दुई दिनमा २८ हजारभन्दा बढीले लगाए कोरोना खोप, कुनै समस्या देखिएन

 

काठमाडौं, १५ माघ । कोरोनाविरुद्धको खोप नेपालमा दुई दिनमा २८ हजार ७३२ व्यक्तिहरुले खोप लगाएका छन् ।

७७ जिल्लाका नागरिकले कोरोना खोप लगाएको स्वास्थ्य मन्त्रालयका प्रवक्ता डा. जागेश्वर गौतमले बताएका छन् । बुधबारदेखि सुरु भयो खोप अभियानको आज दोस्रो दिन हो ।

प्रवक्ता गौतमका अनुसार प्रदेश १ मा ३ हजार ८४७ जनाले, प्रदेश २ मा २ हजार १७४ जनाले र बाग्मती प्रदेशमा ११ हजार ४६१ जनाको उक्त खोप लगाएका छन् ।

त्यस्तै, ४ हजार ५८३ जनाले, लुम्बिनीमा २ हजार ३०३ जनाले, कर्णालीमा १ हजार ६७७ जना र सुदूरपश्चिममा २ हजार ४१७ जनाले कोभिडविरुद्धको खोप लगाइसकेका छन् । अहिलेसम्म कसैलाई पनि यसको कुनै नकरात्मक प्रभाव र स्वास्थ्य समस्या नदेखिएको प्रवक्ता गौतमले स्पष्ट पारेका छन् ।

सरकारले पहिलो चरणमा स्वास्थ्यकर्मीहरु, फोहोरमैला व्यवस्थापनमा खटिने फोहर संकलक र तथा चालकहरु, एम्बुलेन्स तथा शव वाहन चालक तथा सहचालकहरु, खोप केन्द्रमा खटिने सुरक्षाकर्मी तथा स्वयंसेवकहरु र महिला स्वास्थ्य स्वयम् सेवकहरुलाई खोप लगाउने मन्त्रालयले जनाएको छ ।

त्यस्तै अन्तर्राष्ट्रिय प्रवेश विन्दुमा कार्यरत स्वास्थ्यकर्मी तथा कर्मचारीहरु, वृद्धाश्रममा रहेका व्यक्ति, हेरचाह तथा व्यवस्थापनमा खटिने कर्मचारीहरु र जेलमा रहेका कैदी तथा सुरक्षाकर्मीहरुलाई पनि खोप लगाउने प्राथमिकतामा सरकारले राखेको छ ।