नागढुंगा–नौबिसे सुरुङमार्ग निर्माणको सम्झौता

६ असोज, २०७६, सोमबार ।

नौबिसे–नागढुंगा सुरुङमार्ग निर्माणका लागि जापानको हाजमा कम्पनीसँग सम्झौता भएको छ । तिहार पछाडि काम सुरु गरेर साढे तीन वर्षभित्र काम सक्ने आयोजनाले जनाएको छ । सोमबार काठमाडौंमा सडक विभागअन्तर्गत्को विकास सहायत कार्यान्वयन महाशाखा प्रमुख अर्जुनजंग थापा र हाजमा एन्डो कर्पाेरेसनका शिव शेखले यससम्बन्धी समझदारीपत्रमा हस्ताक्षर गरेका हुन् ।

२२ अर्ब रुपैयाँमा बन्ने सो सुरुङमार्ग नागढुंगाबाट धादिङको नौबिसे सम्म २७ किलोमिटरको हुनेछ । कुल लागत २२ अर्ब मध्ये सहुलियत ऋण सहयोग १६ अर्ब हुनेछ । नेपाल सरकारले आफ्नो स्रोतबाट ६ अर्ब व्यहोर्दैछ । जापानी कम्पनीसँग साढे १३ अर्ब रुपैयाँमा सम्झौता भएको हो । बाँकी रकम मुआब्जालगायतमा खर्च भइरहेको आयोजनाले जनाएको छ ।

आयोजना ४२ महिनाभित्रै सम्पन्न हुनेगरी जापानी कम्पनी हाजमासँग ठेक्का सम्झौता भएको हो । सुरुङ मार्गमा दुईओटा ‘फ्लाइओभर’ बन्नेछन् भने सातओटा पुल बन्ने महाशाखा प्रमुख थापाले जानकारी दिनुभयो । सो लगानीका लागि जापानी सहयोग नियोग (जाइका)ले ४० वर्षमा तिर्ने गरी ०.०१ प्रतिशत ब्याजमा १६ अर्ब ६३ करोड ऋण उपलब्ध गराएको छ ।

निर्माण ठेक्का पाउने कम्पनीले कुलेखानी–२ तोकिएको समयमै सम्पन्न गरेको छ । यस्तै, बनेपा–सिन्धुली–बर्दिबास सडकखन्ड पनि समयमै निर्माण सम्पन्न गरेकाले यो आयोजना पनि समयमै सक्ने आशा लिएको थापाले बताउनुभयो ।