Saroj Poudel
काठमाडौं, १३ भदौ । सञ्चार तथा सूचना प्रविधिमन्त्री गोकुल बास्कोटाले प्रेस स्वतन्त्रताको नाममा गणतन्त्रलाई चुनौती दिने कार्य अस्वीकार्य हुने बताएका छन् ।
राष्ट्रियसभामा मिडिया काउन्सिल विधेयकबारे सांसदले उठाएको प्रश्नको जवाफ दिँदै मन्त्री बास्कोटाले यस्तो बताएका हुन् ।
मिडिया काउन्सिल विधेयकले प्रेस तथा अभिव्यक्ति स्वतन्त्रतालाई कमजोर नबनाउने भन्दै प्रेसलाई व्यवस्थित र मर्यादित बनाउन नै उक्त विधेयक ल्याइएको उनको भनाइ थियो ।
त्यस्तै मिडिया आफैं बहकिएर स्वतन्त्रताको नाममा स्वच्छन्दतालाई प्रेसको परिभाषाभित्र अनुबन्धित गर्न खोज्दा विश्वसनीयतामाथि प्रश्न उठेनको उनले बताए ।
तानाशाही व्यवस्थामा नबोल्नेले अहिले गणतन्त्र आफुले ल्याएको दाबी गर्दै बक्तव्य बाजी गर्दै हिँडेको भन्दै बाँस्कोटाले आपत्ति जनाए । ‘कहिले देश टुक्र्याउउन आऊ, कहिले गणतन्त्र समाप्त गर्न आऊ, । कहिले के गर्न आऊ, भनेर खुला चुनौती दिने गणतन्त्रलाई ?’ उनले भने,
‘निरंकुशताको रहल पहल आज पनि स्वतन्त्र प्रेसको नाममा फणा उठाउन खोज्दैछ । स्वतन्त्र प्रेस हिजो तिनले गर्या थे ? पञ्चायतको भक्तिभाव गर्या थे । निरंकुश राजतन्त्रको गाना बजाना गर्या थे’, उनले थपे ।
‘लोकतन्त्र गणतन्त्र स्थापित नहोस्, भद्रगोल होस्, प्रणालीले काम नगरोस् भन्ने तहबाट हुने बाहय आक्रमणहरु र मिडिया आफै वहकिएर स्वतन्त्रताको नाममा स्वच्छन्दतालाई प्रेसको परिभाषाभित्र अनुबन्धित गरेर जान खोज्ने कुराले प्रेसको विश्वसनियतामाथि प्रश्न उठाएको छ’, बाँस्कोटाले भने ।
Upendra Adhikari
