Upendra Adhikari
धादिङ : क्षेत्र नम्बर १ बाट निर्वाचित प्रतिनिधि सभा सदस्य आशिका तामाङको पछिल्लो कार्यशैली र अभिव्यक्तिले जिल्लाको राजनीतिक तथा प्रशासनिक वृत्तमा ठूलो तरंग पैदा गरेको छ। पदीय मर्यादा र कानुनी सीमालाई बेवास्ता गर्दै सांसद तामाङबाट भइरहेका हस्तक्षेपकारी गतिविधिले राज्यका निकाय र स्थानीय सरकारबीचको सम्बन्धमा गम्भीर दरार उत्पन्न गराएको छ।
हालै थाक्रे गाउँपालिकाको सिम्लेमा भएको सडक दुर्घटनापछि सांसद तामाङले सिम्ले प्रहरी चौकीका सबै प्रहरीले मदिरा सेवन गरेको भन्दै सामाजिक सञ्जाल फेसबुकमार्फत गम्भीर आरोप लगाएकी थिइन्। तर, जिल्ला प्रहरी कार्यालय धादिङले विज्ञप्तिमार्फत उक्त कुराको पूर्ण खण्डन गरेको छ। बैरेनी अस्पतालको मेडिकल रिपोर्ट र ब्रेथलाइजर परीक्षणबाट प्रहरीले मदिरा सेवन नगरेको पुष्टि भएपछि तथ्यहीन कुरा फैलाएर सुरक्षा निकायलाई बदनाम गराउन खोजेको भन्दै सांसदको कार्यशैलीप्रति प्रहरीले कडा आपत्ति जनाएको छ।
सांसद तामाङले निर्वाचित भएदेखि नै स्थानीय सरकारको कार्यक्षेत्रमा ठाडो हस्तक्षेप गर्दै आएको पाइएको छ। शपथ ग्रहण समेत नगर्दै बेनीघाट रोराङ गाउँपालिकाले कानुन सम्मत उठाउँदै आएको ढुवानी कर बन्द गर्न उनले दिएको ‘ठाडो आदेश’ले पहिलो पटक विवाद निम्त्याएको थियो।
त्यस्तै, गल्छी गाउँपालिकाको बैरेनीमा निर्माणाधीन अस्पताल, ढल निकास तथा खोला व्यवस्थापनका विषयमा यथार्थ नबुझी उनले गाउँपालिका अध्यक्ष लगायतका जनप्रतिनिधिमाथि आक्रामक शैलीमा हप्काउने र चिच्याउने काम गरेकी थिइन्। थाँक्रे गाउँपालिकाको वडा नम्बर ७ मा भएको दुर्घटनाका बिषयमा पनि सांसद तामाङले यथार्थ नबुझी हचु्वाको भरमा गाउँपालिका अध्यक्षलाई विभिन्न आरोप लगाउँदै भिडलाई उत्तेजित बनाउने कोशिस गरेको आरोप छ । पीडितलाई न्याय दिलाउने वा विकासको अनुगमन गर्ने आवरणमा स्थानीय जनप्रतिनिधिलाई अपमान गर्ने र फेसबुकबाटै प्रशासन चलाउन खोज्ने उनको प्रवृत्तिको अहिले तीव्र आलोचना भइरहेको छ।
सांसद तामाङले पदीय जिम्मेवारी र मर्यादा भुलेर ‘हचुवा’का भरमा बोल्ने र भिडलाई उत्तेजित पार्ने गरेको जनगुनासो चुलिएको छ। स्थानीय तहको अधिकार, कार्यक्षेत्र र कानुनी व्यवस्थाका विषयमा बुझ्दै नबुझी हस्तक्षेप गरेको भन्दै धादिङका १३ वटै स्थानीय तहले लिखित रूपमै उनीप्रति असहमति जनाएका छन्।
कानुन र विधिको वास्ता नगरी ‘आफूले बोलेको नै कानुन हो’ भन्ने भ्रममा सांसद तामाङ देखिएको र यसले गर्दा स्थानीय सरकार र संघीय सांसदबीचको कार्यगत सम्बन्ध चिसिएको छ। एकातर्फ तथ्यहीन आरोप लगाएर सुरक्षा निकायको मनोबल गिराउने र अर्कोतर्फ निर्वाचित जनप्रतिनिधिलाई अमर्यादित शब्द प्रहार गर्ने उनको कार्यशैलीले जिल्लामा अराजकता र अविश्वासको वातावरण मात्र सिर्जना गरेको विश्लेषण गर्न थालिएको छ।
