Upendra Adhikari
धादिङ। बालमैत्री स्थानीय शासनयुक्त वडा घोषणा कार्यक्रमको अनुभव आदान–प्रदान तथा अवलोकनका लागि काठमाडौंको टोखा नगरपालिका वडा नं। १० को टोली गल्छी गाउँपालिकामा आएको छ।
टोखा–१० का वडा अध्यक्ष मचाकाजी महर्जनको नेतृत्वमा आएको टोलीमा बाल क्लबका पदाधिकारी तथा प्रतिनिधिहरूको सहभागिता रहेको थियो। टोलीले गल्छी गाउँपालिकाले सञ्चालन गरिरहेको बालमैत्री स्थानीय शासनका गतिविधि, अभ्यास तथा उपलब्धिबारे जानकारी लिँदै अन्तर्क्रिया कार्यक्रम सम्पन्न गरेको हो।
अन्तर्क्रिया कार्यक्रम गल्छी गाउँपालिका वडा नं। ७ मा समेत आयोजना गरिएको थियो। कार्यक्रममा गाउँपालिका अध्यक्ष केदारनाथ खतिवडा, विभिन्न वडाका वडा अध्यक्षहरु,बालमैत्री सहजकर्ता विपिन मल्ल, गल्छी बाल सञ्जालका अध्यक्ष लगायत जनप्रतिनिधि, बालबालिका तथा सरोकारवालाहरूको सहभागिता रहेको थियो।
कार्यक्रममा बालमैत्री स्थानीय शासन कार्यान्वयनका अनुभव, चुनौती तथा असल अभ्यासहरूबारे छलफल तथा अनुभव आदान–प्रदान गरिएको आयोजकले जनाएको छ।
