थाक्रे गाँउपालिकाद्धारा माटो परिक्षण शिविर सम्पन्न ।
राजाराम डंगोल मंसिर १९ फोगटपुर, धादिङ । धादिङको थाक्रे गाउपालिकामा विश्व माटो दिवसको अवसरमा माटो परिक्षण शिविर सम्पन्न भएको छ ।
थाक्रे गाउपालिकाको वडा नं. ८ महाङकाल मन्दिरको प्राङगणमा राखिएको शिविरमा थाक्रे गाउपालिका का विभिन्न वडा का कृषकहरुले परिक्षणका लागि लेराएका ९३ थान माटोको परिक्षण गरिएको थियो ।
गाउपालिकाले आयोजना गरेको माटो परिक्षण शिविरमा कृषकहरुलाई माटोको नमुना लिने तरिका तथा माटोमा रहेको विरुवाको लागि आवश्यक रहेको विभिन्न खाद्यतत्वको बारेमा पनि वताइएको थाक्रे गाँउपालिकाका कृषि शाखाका प्रमुख राजेन्द्र रुपाखेतीले बताउनु भयो । कार्यक्रममा गाउपालिकाका अध्यक्ष रामकुमार आचार्य तथा उपाध्यक्ष अम्विका रुपाखेती लगायतको उपस्थिती रहेको थियो ।
कार्यक्रममा बोल्दै गाउपालिकाका अध्यक्ष आचार्यले थाक्रेको कृषिको विकासको लागि एउटा खाका तयार भैसकेको र आगामी दिनमा पनि कृषि संग सम्वन्धित कार्यक्रम गाउपालिकाको सम्पूर्ण वडामा गर्ने योजना पनि रहेको बताउनु भयो । साथै उहाले थाक्रेको ८ नं. वडा वाट सुरुभएको माटो परिक्षण कार्यक्रम गाउपालिकाका ११ ओटै वडामा संचालन पनि गरिने बताउनुभयो । माटो परिक्षण शिविरमा कृषकहरुको उत्साहजनक सहभागिता रहेको थियो ।
